Ächendlich hatt‘ ich doss, üwer doss ich heut‘ schreib‘, scho lang vuurghood, owwer jedesmoll iss a annersch Dhema dazwösche komme. Jetzt muss es owwer sei, denn es gedd ömm die Bewahrung vo Kultur, Erinnerunge unn Tradition. Wenn mich murrn odder üüwertsmurrn der Schlooch dreffd, konn ichs nix mer gschreib, also mach ich‘s jetzt endlich. In Zeiten vo Gebietsreform (ja, ich wääs, däss die scho‘ lang her iss), Verwaltungsgemeinschoffde, Dörfferzommleechunge unn Spielgemeinschoffde konn mer sich fast nix mer vuurgstell, däss sich Nochberdürffer früher spinnefeind worrn, unn sich ghänselt hömm, woo’s nur ging! Unn dodrömm gob‘s Spottnoome!
Fladunger Maulaffen und Sandberger Gööger
Mer hodd mehr odder weniger erklärboore Spaßnoome für die Dürffer neewedroo erfonne unn woor dodebei nedd grood zimperlich. Ehrer harmlos worrn (unn senn) die „Önnerwässebrönner Bloobäuch“ (hatte billige, bloowe Schürzer droo, die bei Hitz odder Reeche die Bäuch bloo gfärbt hömm) odder die „Burgläurer Boochklöß“ (hömm die gekochte Klöß in ihr’n Booch gekühlt). Aa nedd sooo schlimm die „Böschemer Maumer“, die „Nurdemer Linsegööger“, die „Wülfershäuser Pätschermichel“, die „Floodunger Maulaffe“ odder die „Sänner Gööger“. Zum Teil woorsch ower aa heftiger.
Trappstadt im Fokus des Spotts
Bei die „Herbschter Schraubköpf“ zum Beispiel. Frooch: „Worömm hömm die Herbschder ömmer Rollgroochebullover droo?“ Antwurrd: „Däss mer s Gewind‘ von Schraubkoopf nedd sidd!“ Odder bei die „Trappschter Häreser“. Erklärung: weil die Trappschter früher oft Kröpf hadde, konnde se monche Würrder nedd ausgschbrech. Die Nochberdürffer hömm doss gewössd unn gsochd: „Ej, Trappschder! Sooch amol „Jucheirasa“! Ging weeche n Groopf nedd, der Trappschter hodd sich owwer bemüht unn a verkrampfts „Härasa“ rausgegnöörd.
Marotten in Althausen
Unn scho hadde se ihrn Spottnoome wagg. Nedd ömmer ging’s ömm Noome, teilweis hodd mer Dürffer unn ihr Bewohner aa weeche ihr Marodde aufgezooche. “Die Althäuser lässe ömmer ihr Hüt droff!“. Hömm sie, die Männer, angeblich in die Wirtschoffd gemocht, weil sich’s bis zu zwee Bier eefoch nedd gelohnt hodd, n Hut roo zu dunn. Odder sie worrn ganz eefoch raffiniert. Wenn die Fraa kurz vor zwöllef komme iss und n Moo aus die Wirtschoffs hool wollt, kannt‘ er mit sei’n Hut gsooch: „Gugg Fraa, grood wollt ich hemm!!!“ Servus, der Eustach, kommt gut nüü!
