Seit’s bei uns widder jede Menge Stürch gidd, muss ich feststell: für mich gidds nur wenig annere Vööchel, die so eine Faszination ausübe wie Meister Adebar! Vielleicht lichts doodroo, däss uns der Sturch bekanntlich gebrochd hodd, wohrscheinlich owwer, weil er vorübergend so selten woor und‘s fast a Sensation gleich koom, wenn mer amol een gsenn hodd. Wenn mer sich amol a weng nöher mit n Sturch befasst, erföhrt mer Erstaunlichs.
Drei Kilo Futter am Tag
So licht zum Beispiel der täglich Futterbedarf für a fünfköpfige Sturchsfamilie bei fast drei Kilogramm! Zum Vergleich: 25 Mäus odder gut tausend Reechewürmer stelle nur 500 Gramm dar. Do iss scho gut, wenn mer n eene odder annere Froosch dazu frisst, unn nedd verwunderlich (grausam!) däss Stürch bei Futterknappheit monichmol glenne, schwoche Junge kurzerhand aus s Nest schmeiße, ömms Überleben vo die störkere, gsonnde Junge zu sichern. Woos ich bis jetzt aa nedd gewössd hoo: treu senn Stürch nur ihr Nester, nedd owwer sich geecheseitig.
Der Sturch/die Stürchin künnt vom Winterquartier in Afrika zwoor ömmer widder zu ihr gleichs Nest zurück, find sich doo owwer a annersch Weible ooder Männle ei, gädds zomm unn würd neu „gheiert“. S konn owwer a beim sellwe Partner geblei, wenns der Zufall unn die Ömständ zulässe. N faszinierendste für mich iss, wie der Sturch aus Afrika sei alts Nest - zum Beispiel in Salz odder Könshoofe (Kurzentrum) - widder find.
Von Afrika ins Grabfeld
Kee Wunner, däss die Männlich in der Regel scho a boor Dooch vuur die Weiblich fliege, süsst dääds wohrscheinlich nedd funktionier, weil sie laufend neigooger dääd. Mer muss sichs wie alles braggdisch vuurstell. Versetze mer uns doch amoll in die Looch vo a Sturchsböörle. Glücklich unn zufriede hodd mer n Winter in Afrika verbrocht, bevuur er ihr odder sie ihm zuglabbert: „Mir müsse los!“ Falls die zwee doch zomm losflieche, mööche die erschte boor tausend Kilometer jo noch funktionier, owwer spätestens kurz vuur München dääd die Streiterei loos geh.
„Flieche mer üwer Nürnberg/Bamberg odder mehr links über Ansbach unn Würzburg?“ Unn falls Nürnberg: zum Schluss über Maro oder doch lieber Autoboo (A70/71)? Unn stell dir vüür, sie komme oo, unn a annersch Böörle höggd in „ihr“ Nest“. Doo muss er Stärke zeig unn glabbert ihr zu: „Setz‘ dich kurz doo düüwe offs Dooch, doss regel ich!!!“ A Sturch iss halt aa bloß a Mensch! Servus, der Eustach.
