Neulich woor ich aach amol in die Alm offn Neuschter Morrdblatz. Ich hatt‘ Gutscheine für „Bauern-Tequila“, unn woor neugierig drauf, woss doss wohl iss. Nedd überraschend hobb ich n Tequila gricht, owwer der Clou woor doss, woss oowe droff geleeche wor: a gerollte Scheibe Bauernspeck mit Meerrettich!
Unn doss wor so gut, däss ich nooch mei Gutschein‘ noch zwee gekäfft hobb. Weniger weeche den Tequila, als vielmehr weeche den Speck und n Meerrettich! Iss jo nedd selten, däss mer irchendwoss nedd weeche die Hauptsach isst odder trinkt, sondern weeche doss, woss es dazu gidd.
Bei Sambuca geht’s vill Leut mehr ömm die Kaffeebohne, die off den Schaps römmschwömme, unn scho süsst woorsch legendär, wie mer Tequila (ohne „Bauern-“) getrunke hodd: erscht hodd mer sei Haand oowedroff zwösche Damme unn Zeigefinger oogeleckt, no Salz drauf gsträäd unn doss dann roogeleckt. Dann iss der Tequila rausgsoffe unn schließlich in a Zitronescheibe neigebesse wurrn. Mit die Gäss-Mooß odder die noch bessere Laterne-Mooß woorsch ähnlich. Sagenhaft!
Geschmacklose Austern
S gidd owwer a wallich Zeuch, doss brengt mer nur noo, wenn woss annersch dabei iss. Die Weißwurscht mit süsse Semf odder die Currywurscht mit Ketschubb senn die bekannteste Beispiele.
Odder woss ganz annersch, doss ich ee enzichs mo, unn dann nie widder gesse hobb: Austern! Werr‘n mit Zitrone, Salz unn Pföffer gesse, weil se süsst nooch Orsch unn Friedrich schmegge.
Nedd ganz so krass, owwer so ähnlich, ging mirsch lang mit n „Italienischen Salat“ in die Pizzeria von Vinzenz (Gott hobb‘n selig) in Grösseneuscht. In a Schüssel worrn onnde dinn grüner Zelood, Gurke unn Tomate unn oowe droff a Schicht mit Kaas unn Schinke. Und genau doss, der Kaas unn der Schinke, worrn sowoss vo gut, däss mer ömmer enttäuscht woor, wenn die Schicht weg woor unn mer no s Grünzeug onnde dinn müss ess hodd.
Do hobb ich mir oft genug gedocht: worömm biet der Vinzenz die Schicht mit Schinke unn Kaas nedd blank oo? Die Idee ghört weiterverfolgt! Stellt euch amol vüür, der Kellermann in Strohlunge dääd a Schäufele mit röscher Kruste ohne Schäufele off sei Speisekorrde setz. Also nur Kruste.
Odder der Karli in die Stodt a halbs Hähnle mit gut gewürzter, knuspriger Haut, ohne Hähnle. Also nur Haut. Doss wär der Renner! Unn ich wer der Erscht, der’s bestell dääd! Servus, der Eustach.
