Mir iss aufgfalle, däss in Todesanzeigen neewe den richtige Noome des/der Erblichenen monichmol aa der Spitznoome mit hie gschriewe würrd. Lena „Lenchen“ Müller, Josef „Blacky“ Maier odder Franz „Käptn“ Schmitt, ömm nur a boor Beispiele zu nenne.
Irchenwo scho gloor, weil mer Leut onnder ihrn richtige Noome oft goor nedd kennt. Däss a Stefanie oft die Steffi, der Manfred der Manni, die Rosemarie die Rosi, der Johannes der Hansi odder der Theodor der Theo (fränkisch: Deo!!!) iss, leucht jo noch ei.
Schwer würrds, wenn’s ömm Spitznoome gedd, die mit dem richtige Noome überhaupt nix tun hömm. Vo Flocki, Macker, Schicke, Futzi odder Dose konn mer jo a wallich nix Sinnvolls obgeleit.
Manche Prominente ändern ihre Namen komplett
Unn vill Leut hodd mer jo tatsächlich nur onnder ihr Spitznoome gekennt und nie so richtig gewössd, wie se tatsächlich hässe. Bei Promis iss doss gang unn gäbe. Beim Joachim „Blacky“ Fuchsberger oder n frühere Fußballer Hans-Georg „Katsche“ Schwarzenbeck zum Beispiel.
Monche Promis ändern ihr Nomme owwer aa komplett. Hobbd ihr zum Beispiel gewössd, däss die „Nena“ Susanne Gabriele Kerner, der „Falco“ Johann Hölzel, die “Lady Gaga“ Stefani Joanne Angelina Germanotta, „Cindy & Bert“ Jutta Gusenburger und Norbert Berger, die „Peggy March“ Margaret Annemarie Battavio, der „Rex Gildo“ Ludwig Franz Hirtreiter unn der „Roy Black“ Gerhard Höllerich ghässe hömm?
Spitznamen können wahlentscheidend sein
Monichmo senn Spitznoome aa richtig wichtig unn sinnvoll. Wie 2020 in Röddelmer gewählt wurrn iss, hömm sich fürrn Gemeinderood zwee „Christian Bauer“ auflessstell. Öm se zu unterscheide, hodd mer kurzerhand die Spitznoome „Iron“ und „Pommes“ off die Kandidateliste gschriewe.
Unn in Aabscht issess legendär, dässes zeitweis sechs Ernst Köhler, sechs Erwin Köhler unn sechs Ernst Müller geewe hodd. Die hodd mer nur üüwer ihr Spitznoome wie „Maler“, „Mambo“, „Guddsacker-Köhler“ odder „Bassdeschuster“ - unn die Hausnummer (!) unterscheid könn.
Soo goobs tatsächlich n Erwin Köhler 36a unn gidds heut noch n Ernst Köhler 99. Unn wenn mer von „99“ redd, wääs jeder, wer gemeend iss. Früher hömm Spitznoome aa scho mo zu schmerzhafte Verwechslunge gführt. Mei Kuseng Bernd hodd zum Beispiel als junger Ministrant amol eene gfange, weil er zum Küster, n „Fichts Joffel“, versehentlich „Tanne Joffel“ gsocht hodd.
Servus, der Eustach.
