Fostezeid is widder, für die Hausbrauer en dr Rhüe seid Ewichkeide Bierbräüzeid. Dr Dufd vom Trewer (Treber: Rückstände vom ausgekochten Malz) stett in dr Luft on Feierdooch isses, wann ich mid mei drei Fässlich zum Bräühaus komm on menn Hausbrautrunk obhol. O gottseälich Fostezeid. Dr Bierkruuch im Bräühaus kreisd, kenn einzicher Tropfe därf verschüdd wern. O so en Dooch setz ich mir mei zweites Gesicht auf – mei Freibiergesichd.

On dann erinner ich mich manchmoal o enn Dooch in menn Lawe, wu mir mei Freibiergesichd buchstäblich eigefrorn is. Für einiche Johr off en Jakobswaach worsch, wu mir ons in Südfrankreich irchendwu in dr Pampa in e Hotel eiquartiert hömm. Alles wor pikobello, e ganz feiner Schubbe hald. On nooch dem feudale Owendesse hömm dr Herbert on ich ons in dr Bar noch e Bierle gegönnt. Tatsächlich, Bier vom Fass, e biere pression, wos in Frankeich jo ned unbedingd üblich is. Mir hömm ons do gleich wie dehemm gefühld on hömm entsprechend zugelangd. On wie. Des erschd Glos, Mhmm, bien! Des zwedd wor noch besser, des dirtt ein Gedicht. Ower dann hömm onnere zwee Weiwerleüt, mei Gertrud on dem Herbert sei Anni es Knoddern ogefange, on mir hömm ons gezwongener Maßen nochm vierte Halwe die Rechnung gab läss. Do hömmer geglotzt. Sache on schreibe 64 Euro wolld där Wirt für ocht „gepresste“ Bier. Enns söö ich eüch, dr Bierdurschd wor weg. Des letzt Neichle vom Glos hömm mir mid Andacht on dem noetwendiche Oppetit dann noch in uns aufgenomme on aus die Maus mit biere pression.

Ich werd den Schrecke vo vuur inzwösche fast fuchzehn Johr, menner Labdooch ned vergesse on wär ömmer dro erinnerd, wann im Schönaer Bräühaus där Kruuch kreisd.

On wu ich des jetz so schreib, kriech ich scho widder so en richdiche Bierdurscht. Wisst ihr wos? Ich mach mich jetz no en Kaaler on press mir en guete Hausbock nei. Prost!