In vielen Kirchen auch in Rhön-Grabfeld finden in der Adventszeit sogenannte Rorate-Gottesdienste statt. Das sind Messen, die ganz früh am Tag bereits stattfinden, egal wie kalt es draußen ist. Die Mundartdichterin und ehemalige Kreisheimatpflegerin Cilli Pigor aus Unsleben erinnert sich im Rhöner Dialekt an die Rorate-Feiern in ihrer Kindheit:
Mit naufgezochene Bää bin ich meistens aufgewacht, weil der Wackerschtää scho fast kaalt wor – wenn der Weckruf durchs Haus gange is: "Alles raus nei die Rorate!" Bos hätt mer net alles drömm gawe, däss mer in sei worm Gröwele offen Schtroehsoock lieche döef blei hätt, anschtatt bei schtockfinstere Nocht früh en halwer sechs aufzuschteiche !
Schnee als einziger Trost
Der änzich Troest wor in dann Moment, däss velleiicht gschneit hot. Mir hömm die Ohrn gschbitzt, ob dauße die Geräusche dumpf geklunge hömm – viel wor jo ömm die Doocheszeit net zu höern, senn raus, hömm mit en Fingernochel die decke Eisblumme oo die Fenster waggekratzt, ömm off es Dooch von Nochber zu schpitze, ower es wor dunkel.
Also nix wie nei, nei die kratzeniche, schoffwollene Schtümpf, es Leible mit die Schtraps und en Knoopf ogezoche, die verschloffene Aache eweng ausgebotzt, e worme Schtreckjacke und e Tüchle odder en School offen Koopf, und nüchtern naus nei die Kält! Mit selwergemochte Dabbe musst mer sich e Pfödle durch en Schnäe trampel, dar manchsmol richtig geknirscht hot.
Zu lange auf das Eis auf dem Weihwasserkessel drücken war keine gute Idee
Alles wor dunkel. Bloß in die Häuser und in die Kerrich hot schwoch e Licht gebrönnt. Der Weihwasserkessel wor eigfroen und wenn mer zu fest offs Eis gedröckt hot, wor der Henschich noos und na hömmder die Finger gebitzelt! Die Wend hömm geglitzert und mir hömm ömm die Wett gebloest, war en längste Haach zommgebrocht hot.
Der Adventskraanz wor fast so schüe wie dar dehämm und sehnsüchtig hob ich mitgezehlt, wenn der Ministrant die Kerze ogebrönnt hot. Und wenner mit sei lange Schtange, wus Lichtle dro wor, non Kraanz gschtoesse is, na hot sich der Kraanz eweng gedräeht – und oo die Deck hömm die Schotte die schöenste Bilderbücher ersetzt, dies domols net zu käffe gawe hot.
Kein Englisch, aber etwas fürs Leben gelernt
Mir hömm für alle Saldote gebatt, hauptsächlich für die, die in Russland aach friern und die, die mer gekennt hömm. Und alsemol hot änns gflennt . Die Orchel hot aach unter die Kält geliede und hot gejommert – und wenn der Schtrom ausgefalle is, kannte die Buewe sich wormgearwet und hömm en Bloesbalch getraate. "O komm - o komm Emanuel..." hot na noch trauricher geklunge und ich hob mir ömmer gewünscht, dässer endlich kümmt und die Öwerschtuwe aufschberrt, wu die Pletzlich dinn verschteckelt senn.
Bei "Tauet Himmel ..." hob ich widder Hoffnung gricht, däss die Rorate endlich aus is, weil mir oo Orm und Bää gschnobbert hömm. Dehämm hots hässe Mellichbröckelich gawe und dabei hömmer unner blitzbloewe Föess nei die Röenn khalle. Wos noos wor, musst schnell widder tröckel, die Schuel is en 8 Uhr ogange.
Mir hömm zwor domols kää Englisch beigebrocht gricht, wos änn jo heut noch nochhengt, ower mir hömm in darre Zeit der Entbehrungen annere Sache gelannt, die beschtimmt genauso wichtich worn für es ganz Laawe.
Und heut? Es senn net die kratzeniche Schtümpf und aach net die Pfädlich durch en Schnäe, die jetz alles so verklärn in unner Erinnerung. Naa - es is dos glückselich Gfühl wos mer empfind nooch die Überwindung, früh aufzuschteiche und en Dooch oozufange mit Ruhe und Schtille in der Dunkelheit, öm sich na off es Licht zu fröe. Dröm komme se widder, die Rorate.
