So, fertig iss die Fußball-EM unn alles gedd widder sein gewohnte Gang. Scho erstaunlich, wie der Fußball a ganz Land in Hochstimmung versetz konn, obwohl jo jeden gloor sei muss, däss vorhandene Surche unn Brobleeme denooch ömmer noch doo senn. Sie worrn bei vill Leut nur solang ausgeblend, bis Deutschland ausgschiede iss.

Mich hodd der Fußball natürlich aa intressiert, owwer wie ömmer worrns die unscheinboore Nebensächlichkeite, die die EM für mich sehenswert gemocht hömm.

Interessante Bandenwerbung in den Stadien

Die Bandenwerbung zum Beispiel. Aufgfalle iss mir, däss „Engelbert Strauss“ sein „Engelbert“ aus sein Firmennoome getilgt hodd. Wohrscheinlich weil der Vuurnoome Engelbert im Geechesatz zu Oskar, Emil, Anton odder Justus heut kaum noch genomme würrd.

Der Vogel Strauss als Logo vo der Firma iss jetzt aa nix merr so detailliert wie vuurher, mer hodd ihn deutlich vereefochd unn idealisiert. A gudds Angebot mecht „Strauss“ aach ohne sein „Engelbert“ nooch wie vuur. Kee Witz: sie biete Arbeitsklamodde im „used look“ oo. Die Hoose unn Jacke sehn, obwohl noochelneu, soo aus, wie wenn se scho a boor Johr aalt senn unn scho a boor Baustelle hinner sich hömm. Braggdisch, wenn mer a Faulenzer iss, owwer nooch auße hie zeig well, wie fleißig mer iss. Schlimm!

Steckt der Welt-Brauerbund dahinter?

A annere Unsitte iss mir bei die Überdroochunge aa noch aufgfalle. Unn ich behaupt, däss doo der Welt-Brauerbund dehinnersteggt! Wenn a Tor fällt, schütte die Fans vuur Begeisterung Bier im Wert vo a boor Tausend Euro weg! Die Becher flieche unn s guut Bier, doss n Haufe Geld gekossd unn für doss mer lang oogstanne woor, fliegt mit furrd. Dann greift der Video-Schiedsrichter ei, s Tor würrd zurückgenomme, unn s Bier iss ömmsuust vernicht wurrn. Versteh, wersch will, ich als spoorsommer Mensch nedd!

Der englische Schiedsrichter Anthony Taylor denkt übrigens aa so – unn hodd Fingerspitzengfühl bewiese! Hodd im Spiel Deutschland – Spanien den Handelfmeter nerr bloß desweeche nedd geewe, weils scho in der 106. Minudde woor. Hädds Elfmeter für Deutschland geewe, unn der Kai Havertz - odder wer aach ömmer - häddn verwandelt, wär s Bier widder gflooche unn für a Neus hädds nix mer gelangt, weil dann bloß noch knapp zehn Minudde Zeid gewese wär. A feiner Mensch, der Anthony! A Pfeuffe-Heini iss er trotzdem. Weil’s freilich a gloosgloorer Elfmeter woor!

Servus, der Eustach.