„Augen auf bei der Berufswahl!“ Doss hört mer ömmer, wenn sich jemand üüwer sein Beruf beschwert unn zugidd, wie unglücklich Sie odder Er, üüwer doss iss, mit der‘s Geld verdient würrd.
Mer muss scho zuugebb, dässes schwerrere unn leichtere Jobs gidd. Owwer giddsn wallich, den Traum-Job schlechthin? Landrood? Hör auf! Döffsd dich mit alle mööchliche Parteie unn Leut römmärcher unn ee Krise joochd die anner.
Pforr? Früher ja, heut? Nää! Stress pur! Lehrer? Gut, 70 Dooch Urlaub, owwer aa jede Menge Ärcher, grood seit Corona, Home-Schooling unn aufmüpfige Elternschaft.
Pilot? Lokführer? Astronaut? Als Pilot bissde vill vo dehemm furrt, als Lokführer künnsde ständig zu spät unn als Astronaut bissde wochenlang midd die gleiche Leut in a enge Raumstation zommgsperrt.
Büstenhalter im Museum?
Aach a Traumberuf vo süsst: Test-Schläfer bei Bettenrid. Ja, läss ich mir eigeh. Owwer ömmer nur schloff? Würrd irchendwenn aa mo langweilig. Unn Bettenrid iss in München. Doo könnsde off die Ärwed zwoor gschloff, dir doochsüüwer owwer die Miet nedd geleist.
Woss gäb’s noch? A boor Berufe, die mer sich vuurgstell könnd, scho! Notenblatt-Umblätterer für n Star-Pianiste, Eincreme-Assistent am 5-Sterne-Pool, Wasserrutschen-Tester, Hundefutter-Vorkoster (gidd’s wallich!), lebendiche Voogelscheuche off n grösse Flughafen. Wäärsch doch, odder?
Aa nedd schlecht: Armleuchter bei Osram, Büstenhalter im Museum, Erbeszähler bei Bonduelle, Kolbefresser bei Fiat, Mauszeiger bei Microsoft odder Woocheheber bei Audi. Doo wär sicher woss zu mache.
Jobben bei Bayern München?
Oft seh ich aa Leut ins Fernsehen unn denk: Mensch, doss wäär doch aa woss für mein Vodder sein Sohn! Die berühmte Maskottchen in die Stadien, wenn Olympia iss odder Fußball gspielt würrd. „Bernie“ bei‘n FC Bayern, „Emma“ bei Borussia Dortmund, „Erwin“ bei Schalke 04 odder „Fritzle“ bein VfB Stuttgart. Traum-Job? Mach’s! 35 Grad im Schodde, du bist scho früh widerwärtig unn schlecht drauf unn sössd no dinn ins Stadion für jeden n Dolle mach! Hör mer auf!
Dann vielleicht doch irchendwoss mit Medien? Sölle die Junge mach. Ich hobb in absehbarer Zeit mein Traumberuf: ich geh nächsts Johr in Rente. Endlich! Rentner! Fast 50 Johr drauf hiegeärwed! Nur sooch ich euch ees: Rentner iss der mit Abstand unn unbestreitboor gfährlichst Beruf der Welt! Worömm? Ganz eefoch: hodd bis jetzt noch niemand üüwerlebt! Servus, der Eustach.
