Sprooch entwiggelt sich bekanntlich unn genau so gut wie neue Ausdrügg dezu komme, falle alte Sprüch unn Ausdrügg wagg. Wobei die neue Würrder unn Begriffe, die jetzt aktuell senn, weitaus weenicher lustig senn wie die, die so langsam owwer sicher in Vergessenheit geroode.
Neue Würrder, die’s noch vuur gut a Johr noch nedd gaawe hodd, senn Spuckschutzscheibe, Impfzentrum, Ausbruchsgeschehen, Beherbergungsverbot, Abstandsgebot, Schmierinfektion odder Soloselbständiger. Lustig? Ehrer nedd!
Die alte Sprüch unn Ausdrügg degeeche: zum Schießen! Wenn mer früher zum Beispiel als junger Kerl s erscht mo Bulldogg döff fohr hodd, unn der Onkel hodd zugeguggt, hodd er oft gsocht: „Fohr nedd so gral römm!“ Doss wor, wenn mer s Lenkrood zu orch eigschlooche hodd, unn hinne die Deichsel von Hänger oo n hinnere Rääf gschläffd hodd.
Höflich worrn unner Altvurrdere fei aach. Wenn die a wohlgenährte junge Fraa gsenn hömm, hädde die nie gsocht: „Gugge mol, eine Degge!“ Nee, taktvoll hodds ghässe: „No darra schmeckts scheinboor aa!“ Iss zwoor offs selwe rauskomme, woor owwer irchendwie vuurnahm.
Die ähnlich Kategorie woorsch, wenn eener weeche Krankheit 20 Kilo oogenomme hadd unn mer ihn s erscht mo widder gsenn hodd. S hieß nedd „Der sidd owwer schlacht aus!“ sondern „No den hömmse ower aa die Gröbste roo!“.
Schöö aach a Ausdrugg, den mer heut kaum noch hört. Wenn eener mit a Auto – ob jetzt nüchtern odder besoffe – irchendwo noo gerommbeld iss, hodd mer oft ghört: „Au weh, doo iss ganz schö widd gange!“ Hochdeutsch „Das Auto ist wider die Mauer gefahren.“ Odder so ähnlich halt.
Einfühlsam worrn die Ältere, owwer trotzdem hömm die Sprüch nie ihr Wirkung verfehlt. Wenn mir als junge Kerl amol so richtig schlecht Fußball gspielt, geeche s Nochberdurrf dehemm haushoch verlurrn hadde unn vonn Sportplatz roogschleche senn, hömm die Alte offn Platz gedeut unn gsocht: „Macht Ardöpfel drauf!“ Elegant ausgedröggd, knallhart gedroffe ower nedd so beleidigend wie „Ihr Blinde!“.
Ich well nochemoll off den neue Ausdrugg „Soloselbständiger“ zurüggkomm. Doss iss wohl eener, der Solo iss, unn selbständig. Muss er aa, süssd dääd er jo verhunger, der alt Junggsell! Ja, die Junggselle, immer noch mei Phänomen: „Sie vermehren sich nicht, aber sie sterben trotzdem nicht aus.“ Servus, der Eustach.
