Gut zwee Woche senn die Bundestagswohle jetzt scho her unn ömmer noch iss mer domit beschäftigt, alles auszuwerte unn zu bewerte. S gidd owwer aa überraschende Detailergebnisse.

Der „Südschleswigsche Wählerverband“ zum Beispiel. Iss bei Landtagswohle in Schleswig-Holstein ömmer widder amol aufgetaucht unn hodd jetzt tatsächlich aa bei die Bundedoochswohl n Sitz gholt! Vo die Fünf-Brozent-Hürde iss der SSW befreit, weil er, so wörtlich, „eine Minderheit mit eigener Kultur und Sprache“ iss.

Sind wir Rhöner nicht auch eine Minderheit?

A Minderheit mit äächener Kultur unn Sprooch? Könnt ich dir bei uns in Landkreis allee vier bis fönnef aufgezähl! Unn weil die Obkürzung „SSW“ bassd, worrd ich scho jetzt drauf, däss der „Südschmalwasserer Wählerverband“ als „Minderheit mit eigener Kultur und Sprache“ Oosprüch oomeldt unn 2025 n Sitz in Berlin well!

Seltsame Blüten treibt die Wohl. Böse Zunge behaupte jo, däss sich jetzt, wo Deutschland nooch 16 Johr mit a Fraa als Kanzlerin widder mo n Moo als Rechierungschef gricht, überraschende Dinge dunn. So wie in Nordkorea scho lang der Fall. Doo, wo seit a boor Johr die zwee Zenner sechzig schwer Flääschwurscht Kim Jong-un mit eiserner Hand regiert, isses jo tatsächlich soo, däss alle Studente genau die selb Frisur hobb sölle wie ihr durchgedrehter Bräsi. Unn alle annere, „normale“ Männer senn aa gut beroode, die Frisur vo doss Bobbele zu hömm, aa wenn se kee Studente senn.

Die Vorteile einer Einheitsfrisur

Unn iich hobb ghört, däss mer sowoss bei uns in Deutschland jetzt aa oostrebt. Alle deutsche Männer sölle die gleich Frisur hobb, wie der zukünftig Bundeskanzler. Doo mecht mer sich no scho sei Gedanke unn ich muss sooch, däss ich n Olaf Scholz ächendlich für goor nedd so verkehrt halt.

Unn mer sölls nedd für mööchlich halt! Neulich hobb ich unnern Landrood widder amol gedroffe unn off doss Dhema mit die Bundeskanzler-Frisur oogsproche. Unn ihr werds nedd glääwe: der Dommas iss laut äächener Aussooch mittlerweil aa reechelrecht begeistert von Scholze Olaf! Hädd iich nie gedocht, owwer es stimmt wallich! Worömm aach ömmer!

Zum Schluss noch a schönner Boliddiger-Witz. Fräächd a Määdle ihrn Vodder: „Papa, worömm gehn ächendlich alle Märchen mit „Es war einmal …..“ los?“ Seechd der Vodder: „Stimmt doch goor nedd! Monche fange aa mit „Wenn ich gewählt werde ….“ oo!!!“

Servus, der Eustach.