Als jemand, der 1959 geburrn iss, staun‘ ich ömmer widder, woss sich die junge Leut heutzudooch alles geleist könne. Sicher nedd alle, unn Ausnohme gidds ömmer unn überool, owwer n Großteil vo die Junge gedds richtig, richtig gut!
Im Winter gedds nei n Skiurlaub unn däss a Tageskarte für die Lifte mittlerweil rund 70 Euro kossd – kee Brobleem. Im Sommer dann natürlich Urlaub. Owwer nedd bloß eemol, sondern monnichmoll zwee- odder goor dreimoll. Mallorca, Côte d’Azur, Ibiza, Costa Brava – kossd es, was es wolle!
Konzerte döffe aa nedd fehl unn a Korrde für die Taylor Swift auf Schalke odder erscht s vergange Wochenend in München für 150 Euro unn mehr – wieso denn nedd? Über die vergangene Generatione seit n Krieg senn vill Häuser, Grundstücke, Äggerlich unn jede Menge Geld weitergschoowe wurrn unn doss muss onnder die Leut gebrochd weer. Die Anreize für Ärwed fönnef Dooch die Woche, Überstonn, Schicht- unn Samsdichsärwed gehn zunehmend flöten.
Der junge Leut geht’s gut unn doss sidd mer aa oo zwee Fußballer, die jetzt nooch Abscht gewechselt senn. Max Böhnke unn Nico Ott stamme aus die Näh vo Erlangen unn hömm zuletzt für Schalding-Heining bei Passau gspielt. Worrn aa extra dürrthie gezooche unn hömm doo gewohnt.
Unn weil se natürlich nedd viermol die Woche zu Training unn Spiel in unner Grabfeld gfohr könne – nedd amoll vo Erlangen aus – senn die zwee Fußballer jetzt zomm in a WG nooch Abscht gezooche. Training iss ömmer owerts n halber siewe odder soo unn doss hässd, däss se doochsüber jede Menge Zeit hömm.
Doo konn eem die Degg scho amol offn Koopf gfall, unn bei die Spielervorstellung neulich hodd eener vo die zwee Spieler gsocht: „In Aubstadt kann man tagsüber nicht so viel machen, aber vielleicht seht ihr uns ja mal beim Joggen.“
In Aubstadt kann man tagsüber nicht viel machen? Ich hätt doo a boor Vuurschläch! Die zwee junge Kerl hömm sicher n Führerschein unn könnte jetzt bei die Ernt zum Beispiel die Wääche naus zunn Mähdröscher gfohr. Irchendwenn senn a die Ruuwe unn die Ardöpfel fertig unn müsse raus.
Unn wenn alles geernt iss unn s würrd Winter, gedds nau’s s Holz. Zwöschedurch könnte se bei’n Martin Wachenbrönner in die Schreinerei a weng Lattlich beim Höfeln beigelang. Also, Max unn Nico, nei die Händ gschbätzt unn ran an die Buletten! Ärwed gidds in Abscht mehr wie genuch! Servus, der Eustach.
