Die Raumfahrt iss a Bereich, der technisch hochentwiggeld iss, unn in dem nix, owwer a goor nix n Zufall überlässe würrd. Milliardenschwere Entwigglunge, Risikomanagement hoch vier, Top-Ingenieure. Trotzdem bassierds ömmer widder, däss Rakeede misamt ihr Raumschiffe unn Satellite scho beim Start explodiern.
Vor Jahrzehnten s tragisch Challenger-Unglück, vuur zwee Woche a Abfallteil, woss uns ball erschlooche hädd, unn erscht vuur a boor Dooch a SpaceX-Rekeede von Elon Musk. Woss ich mer doo jetzt zum wiederholte mo gedocht hobb: der Herrgott woor scho a Hund! Hodd uns Mensche a "Maschine" geewe, die so zuverlässig unn leistungsfähig iss, wie nedd oonähernd a von Menschenhand gschaffens Gerät: unner Herz!
Es schlägt und schlägt und schlägt...
Faszinierend, woss doss leist! Pumpt jeden Dooch bis zu 10.000 Liter Blut durch unner Gfäße, schlööd dabei 60 – 80 mo pro Minudde, also 4.200 mo pro Stunn und 100.000 Mal pro Dooch! Hässd: im ganze Leewe bis zu 3 Milliarden moll! Dooch unn Nocht, 52 Woche im Johr, 80, 90 odder goor 100 Johr lang. Ohne jede Unterbrechung! Unn wenn die "Maschine" a nur a boor Minudde stenn blei unn nedd funktionier dääd: Schluss, aus, fertig! Exitus!!! Unfassboor, vor allem wenn mer überleecht, woss monche Leut durch schlechte Ernährung, Sauferei, Bewegungsmangel usw. ihr „Maschine“ alles zumute.
Aach a berechtigte Frooch: worömm moole mir Mensche a Herz so, wie mersch moole? Liebe unn Zuneigung senn scho weit vuur Christi Geburt mit Feigen- unn später mit Efeublääder stilisiert wurrn. Später senn Efeublääder als Liebessymbol aa rot, der Farbe der Liebe, gemoold wurrn, unn doss hodd sich dann nooch Europa verbreit‘.
Die Herzfrequenz von Blauwal und Ertruskerspitzmaus
Hochintressant aa, welchen Herzschlooch verschiedene Lebewesen hömm. Die Rekordhalter: bei der nur 2 Gramm schweren Ertruskerspitzmaus schlööds Herz 1.000 mo pro Minudde, bei’n 100 Tonne schwerre Blauwal nur 6 moll! Alle 10 Sekunde eemol! Und: Musik konns Herz schneller schloo läss odder es beruhig unn langsamer mach‘. Weil der Rüddmuss vo n Fox odder a Polka ungfähr soo iss, wie unner Herz schlööd, tanze doss vill Leut‘ gern.
Woss ich doo überleechd hobb: off woffer Mussig tanze dann wohl Ertruskerspitzmäus‘ odder Blauwale? Für die Maus iss jo selbst a "Schecher"“ extrem langsam, unn der Blauwal denkt bei n langsame Walzer odder n Schwoof: "So eine Hetzerei!!!"
Servus, der Eustach.
