Ich bin nerr froh, dässe sellemoll n 3. Oktober als Feierdooch eigführt hömm, weil uns süsst jetzt bis Allerheilige der Schnoobel drogge blei dääd. Mariä Himmelfahrt iss römm unn der 1. November noch weit wagg.
Ja, die Feierdeech. Aa so a Dhema. Hobb ich mir n 15. August erscht widder gedocht. Wösse doo überhaupt noch vill, ömm woos es üwerhaupt gedd? Däss Feierdooch iss, ja, owwer worömm unn wieso?
Bayern liegt bei der Zahl der Feiertage vorne
Bayern licht mit 13 Feierdeech im Johr zomm mit Baden-Württemberg oo die Spitze (MeggBomm, Hamburg, Bremen unn annere hömm drei weniger!), owwer rechert mer die bekannte Kirchenfeste wie Pfingste, Össder unn Weihnochde unn die weltliche Feierdeech 1. Mai unn 3. Oktober weg, bleiwe mit Dreikönig, Fronleichnam, Mariä Himmelfahrt unn Allerheilige mindestens vier Dooch übrig, wo vill Leut rot im Gsicht weer müsste, wenn se früh lieg blei döffe unn nedd off die Ärwet müsse.
Sie senn entweder scho aus die Kirch ausgetreede, odder sie senn noch dinn, denke oo solche Deech owwer nedd aa nur ee Sekunde droo, wen ses zu verdanke hömm, däss frei iss. Soo a Feierdooch kosst der Wirtschoffd jo ein Schweinegeld, owwer s würrd nedd im Entfernteste aa nur drüü noochgedocht, een vo die vier Feierdeech oozuschaffe. Unn wenn, müsste entweder die Gewerkschoffde drüü verhannel, eefoch vier neue freie Dääch einzuführn, die keen Noome grieche unn eefoch durchnummeriert werrn, odder der Staat müsst vier weitere weltliche Feierdeech wie jetzt scho n Internationale Frauentag in Berlin (8. März) odder n Weltkindertag in Thüringen (20. September) eiführ. Schöö verdääld alle drei Mooned een, unn wenns gädd beweglich offn Diesdich odder Durschdich, däss schöö Brögge gebaut weer könne.
Ein Gutschein für den Arbeitgeber
Owwer eefoch vier bis jetzt freie (Feier-) Dooch obschaff? Undenkbar! Gäb n Volksaufstand! Wenn ich in die Kirch woss zu sooche hädd, dääd ichs amoll browier unn drauf oolesskomm. Beispiel Fronleichnam. Jeweils im Vorjohr würrd schriftlich unn nachvollziehbar erfasst, wer in die Kirch unn bei die Prozession woor. Am Schluss werrn nooch s viert Äldöörle in a Kabine fönnef Frooche zu Fronleichnam gstellt, unn wer mindestens drei devo richtig beantwurrd konn, gricht für’s Johr drauf n Gutschein, den er bei sein Arbeitgeber eireich muss unn dann frei hodd. Der Rest schafft!
Welle mer doch amoll seh, ob mer die Kirche nedd widder vool brenge! Servus, der Eustach.
