Do drauf hömm mir doch scho so lang gewadd. On jetz isser do, dr Wumms. Wos sooch ich, zegor der Doppel-Wumms, sozusooche ein Wumm-Wumms. Ich bin sprachlos. Gell onner Olaf, wos dem ned alles eifällt? So ein Wumms is doch für ons alle e verfrühtes Weihnochtsgeschenk. Die Gaspreise wern ogehalle, off en Konto stenn seit letzt Woche 300 Euro Energiepauschale, die allerdings in die letzte drei Monat schon ömms zich-fache aüsgegawe sinn. Vill mehr Wumms gidds jo gor ned. Ich bin jo sowos vo begeistert vo onnere Wumms-Rechierung.
Inzwösche is jo dem Olaf sei Doppel-Wumms als Mehrfach-Wumms in den Koalitionsvertrooch aufgenomme worn, dr Zigfach-Wums find sich inzwösche mehrmoals im Haushaltsentwurf vom Lintnersch Christian, dr Lauterbachs Karl hat standesgemäß für die nächste poor Woche den mehrfache Corona-Wumms ogekündicht, on dr Södersch Markus will unbedingt mit sei Kernkraftwerk in Landshut den nächste Wumms erzwing, senn Traum-Wumms sozusooche.
Ömmerhie gidds im Fernseh kee Nochrichtesendung mehr, ohne dass ned mindestens fönnenf moal en Wumms ogekündicht werd. Zegor dr Merze Frieder is vo dem Wumms ganz begeistert on will o den Doppel-Wumms am liebste noch en weitere Wumms ohäng, en Dreifach-Wumms also.
Debei hömm die Bayern on die Leipziger am letzte Sonnowend mit ühr zweifaches Vier Null scho en zweifoche Doppel-Wumms erzielt.On aach dr Pep Guardiola hat für e poor Johr senne Bayern en Supersupersuper-Wumms bescheinicht.
Es wird also o alle Ecke on Ende gewummst. Mit ühr Kanone bei die Queen ühr Beerdichung hömm die Engländer en regelrechte Massen-Wumms veranstalt, in dr Ostsee hats o die Gasleitunge en doppelte Doppel-Wumms gawe on in dr Ukraine will die Wummserei gor nix mehr aufhör. Debei hat doch die Panzer-Lamprecht mit ühr fönneftausend Schutzhelme im Frühjohr doch allens scho für en witziche Mega-Wumms, wann net zegor für en Giga-Wumms gesorcht.
No on aach bei onnere Promis off die Rückseite vo die Bildzeitung werd toochtächlich für en Wumms nooch en annere gesorcht. Ower des is dann doch eher Bums statt Wumms. Wurscht. Dr Wumms, dr Doppel-Wumms, dr Drei- on Vierfach-Wumms, dr Riesen-Wumms werd so on so zum Wumms, äh zum Wort des Jahres gewählt. On aach dem Klaus Lage sei Liedle kömmt nooch so ville Johr widdr groeß raus mit „und es hat Wumms gemacht“. Ned auszudenke.
