Jetzt, in der Fastenzeit, hömm mer unnern Koopf nooch n lange Fasching widder frei unn könne uns mit a interessants Dhema, der Logik, befass.
Logik iss ächendlich ganz eefoch. Drei Beispiele. Wenn’s reend, würrd die Ströss nooß. S reend. Also iss die Ströss nooß. Odder: alle Vöögel hömm Faader. A Honnd hodd kee Faader. Also iss a Honnd kee Voochel. Und: wenn du mit dei Auto off a Vorfahrtsströss föhrscht, oo a Ausfoohrt a annersch Auto worrd, du rechts n Blinker setzt, unn doss anner Auto rausföhrt, wässd du, däss dei Blinker funktioniert. Logisch, süsst wär s anner Auto nedd rausgfohrrn.
Wie neulich mei Auto in die Werkstodd woor, unn ichs widder oogholt hobb, woor wie ömmer der Fohrersiitz dodaal verstellt unn im Radio woor Antenne Thüringen statt Bayern1 eigestellt. Logisch, däss der Kfz-Mechaniker, der oo mei Auto gschafft hodd, aus Hildburghause woor.
Und no gidds noch die legendär Logik vo Mudder unn Vodder: „Ess dei Gemüs, däss de grooß unn storgg würschd!“ Die Alltagslogik voss Kind owwer seechd: „Der Hoos essd nur Gemüs – unn iss trotzdem glenner wie iich!“
Unn seit Jahren predige mer unner Kinner: „Esst euern Daaler leer, no hömmer murrn schöö Wadder.“ Unn woss hömmer devo? Fette Kinner unn Klimaerwärmung! Alles Logik.
Worömm ich mich doodrüü heut ausläss? Hodd mit mei Blutdrucktableddlich zu dunn. Ich wääs nedd worömm, owwer ich hobb neulich drüü noochgedocht, worömm die meistens in Baggunge zu 100 Stück obbgebaggd senn. Doss hässd: ömmer wenn mei 100 Dableddlich verbraucht senn unn iich a neus Rezept brauch, senn logischerweis gut drei Mooned römm unn doss hässd, mir senn in a neus Quartal.
Unn woos iss, wenn mer in a neus Quartal senn? Richtig! Mir müsse weeche s Rezept zu unnern Hausoorzt, unn doo muss unner Krankehauskörrdle durchgezooche weer. Der Hausoorzt gricht doo defür a Pauschale. Wohrscheinlich nedd vill, owwer für eemol nur s Körrdle durchzieh, immerhin. Unn doss alle drei Mooned. Quartal für Quartal, Johr für Johr, Johrzehnt für Johrzehnt. Eeemol Blutdruckdableddlich, ömmer Blutdruckdableddlich.
Logisch weersch doch, wenn 365 statt 100 Dableddlich verbaggd wääre. Eemol im Johr zum Hausoorzd, Körrdle durchgezooche, eemol Geld fürrn Doggder. Unn die Krankekasse dääde n Haufe Geld spoor. Logisch! Odder nedd? Servus, der Eustach.
