Als fliegerische Meisterleistung gilt bekanntlich doss, woss der amerikanisch‘ US-Airways-Pilot Chesley Sullenberger n 15. Januar 2009 in New York vollbracht hodd. Kurz nooch n Start worrn Gäns in die Triebwerke vo sein Flieger komme, unn s Flugzeug konnt nur noch im Gleitflug weitergfliech. Unn der Meisterpilot hodd’s tatsächlich gschafft, sei Flugzeug soo offn Hudson-River zu lande, däss nix bassierd iss, unn 155 Passagiere unversehrt gebliebe senn unn gerett‘ weer konnde. Bravo!
Nix ggeche uns Mensche, owwer woss in der Beziehung in die Tierwelt geleist‘ würrd, konn sich aa absolut gseh läss. Der Feldhoos zum Beispiel, erreicht off der Flucht a Gschwindigkeit vo 80 Stundenkilometer unn wär doomit bei’n 100-Meter-Lauf in 4,5 Sekunde im Ziel. Aktueller Weltrekord bei uns Mensche: Usain Bolt, Jamaika, 9,58 Sekunde. Doppelt so lang, lachhaft!
Beispiele aus der Sportwelt
Anneres Beispiel: bei die menschliche Gewichtheber liegt der Weltrekord bei 266 Kilogramm in die höchst Gewichtsklass‘ (über 105 kg Körpergewicht). A Gorilla stömmt logger 900 Kilo!
Hochsprung: der Springfroosch schafft zwoor nur zwee Meter, owwer doss iss s 33-fache vo sei Körpergröß‘! Wenn a menschlicher Hochspringer 1,90 Meter groß iss, müsst er im Vergleich knapp 63 Meter hoch spring! Aktueller Weltrekord: läbbische 2,45 Meter.
So. Unn jetzt zu mei Erfohrung. Ihr werd’s mir als Eustach ned zutraue, owwer ich fohr ab unn zu midd mei Forhrrod nauf n Kreuzberg. Ohne E, Bio-Bike. Unn in die Wälder rund ömm Schönaa, Burgwollwich, Hohenroth odder Böschem ergidd sich je nach Route ömmer widder a Schauspiel, doss ich nur als fliegerische Meisterleistug bezeichen koo!
Rückwärts fliegende Mücken
Ich bin kaum im Wald, es würrd steil, ich schwetz wie die Sau, doo dauerts kee zwee, drei Minudde, bis die erschte glenne Mügglich doo senn. Steh‘ blei döffsde dann eh nedd, owwer selbst bei’s Fohrn so mit 6, 7 Kilometern pro Stunde n Berg nauf, fliege diese Mügglich rückwärts (!) hunnerde vo Meter vuur dir her, als ob’s nix Efocheres gääb!
Sie halte n Abstand zu die Sonnebrill‘ peinlichst genau ei, fliege rückwärts (!) weiter, unn egal woss du mechst, gfühlt 20 Mügglich begleite dich (rückwärts !) in gleichmäßigster Gschwidigkeit bis nauf unnern heilige Berg.
Ob die dann jemols widder nooch Schönaa, Burgwollwich odder Böschem zurückkomme? Ich wääs es ned. Desweeche – bei aller Lästigkeit – Hochachtung für euch glenne Meisterflieger! Hünd seid ihr scho! Servus, der Eustach.
