Ja, sooch amol!!! Könne mer in Deutschland denn überhaupt noch irgend woss? Ja, okay, ich wääs, Basketball. Owwer süsst? Nur noch Enttäuschunge, überool schlechte Stimmung, Katzejommer, Bessimismus. Es iss owwer a schwer, noch oo uns zu glääwe. Die Fußball-Männer scheide 2018 in Russland und 2022 in Katar scho in die Gruppenphase aus (verliern zuletzt 1:4 gege Japan), die hochgelobte Frauen maches den Herren der Schöpfung erscht kürzlich in Australien nooch.

Gut, dann halt Leichtathletik. WM neulich in Budapest: 46 Länder hömm mindestens ee Medaille gholt, mir Deutsche: nedd eene!!! Dann Rudern. Der Achter. Do worrn mer doch ömmer gut! Pfeuffedeggel: bei die WM in Belgrad im Vorlauf nedd onnder die erschte zwee komme: Hoffnungslauf.

Probleme, wo man nur hinschaut

Owwer jo nedd ner bloß im Sport! Mir falle üüweroll zurück. Digitalisierung, Bildung, Kita-Plätz, Klimaziele, Wirtschaft, Export, Wohnungsbau. Brobleeme, wo mer nur hie guggt! Unn vur a boor Woche a Riesen-Blamaasch vuur die ganz Welt: der Regierungsflieger vo unner Außenministerin kabudd, unn zwee mo kurz nooch n Start widder geland‘. Ächendlich müsste mer die Ärmel hinnerstreffel unn schaff, woss s Zeug hält.

Stattdessen welle vill kee Schicht mer mach unn nix mer n Samsdich schaff. N Freidich aa nix mer: 4-Tage- unn 30-Stunden-Woche. Unn monche treibes anscheinend off die Spitze! Neulich hobb ich a Fohrzeug vonn Opti gsenn, do woor „Montage-Team“ droff gstanne. Montage!!! Unn woo senn no die Diesdichs-, Mittwochs-, Durschdichs- unn Freidichs-Teams so lang? Wohrscheinlich ins Schwimmbood odder in die Wirrdschoffd! Witz! Gedd jo goor nedd, do schließt jo eene nooch die anner! Seh ich zu schwoorz? Ich befürcht, nedd. Die Welt iss heut‘ eefoch a komplett annere.

Vierzehnheiligen und ein Feldhamster

Eltern geewe off Kreuzfahrtschiffe ihr Kinner früh in die Kita off’s Schiff oo unn hole se owerts widder. Dässe ihr Ruh hömm! Unn alles iss so unheimlich kompliziert wurrn! Stellt euch nur amoll vüür, mer wölled heutzudooch a Basilika wie die in Vierzehheilige bau. Domols mit n geniale Baumeister Balthasar Neumann zwösche 1743 unn 1772 in knapp 30 Johr erledigt. So lang dääd heut wohrscheinlich s Genehmigungsverfahren dauer! Unn dann hätte mer kee Leut - Personalmangel! Odder noch wahrscheinlicher: mer dääd in die Näh von Staffelberg n Feldhamster finn…….. Schluss, aus, fertig!

Servus, der Eustach.