Zwee Sache, die nix, owwer a goor nix mitenanner zu dunn hömm, hömm mich die letzte boor Dooch bewegt: die BayWa-Kreuzung-Baustell - unn s Finale in der Fußball-Bundesliga.

S erscht Dhema: Fußball-Bundesliga. Der Marco Reus vo Borussia Dortmund hatt‘ sei letzts Spiel unn hodd für die ganz „Gelbe Wand“, der legendären Fankurve in Dortmund, Freibier ausgeewe.

Als Normalsterblicher recher ich bei sowoss ömmer, woss doss kossd, unn woss doss finanziell für uns „normale“ Leut bedeut‘ dääd. Also: dem Marco Reus hodd die Runde Bier angeblich 120.000 Euro gekossd. Heftig!

Owwer: der gut Moo hodd brutto 7,5 Mio. Euro verdient. Ömmgerechert hätt‘ sei Freibier n Normalverdiener grob gerecherd 900 Euro gekossd. Nedd wenig, owwer für n Ausstand in a Firma odder a Abteilung mit vill Leut‘ nedd ganz udobisch. Wer koo, der koo.

Kaum war gesperrt, begannen die Arbeiten

Mei zwedds Dhema, derzeit in aller Munde: die Baustell oo die BayWa-Kreuzung! Gewunnert unn gfrääd hodd mich: kaum woor alles gsperrt, scho iss gschafft wurrn. Unn wie! Wenn mer stodtauswärts föhrd, sidd merr so vill rot-weiße Absperrbaken unn -gitter wie nie zuvor!

Unn ich wäss nedd, wie’s euch gange iss: wie ich mitgricht hobb, däss Bagger den neuralgische Punkt, also genau die Medd vo die Kreuzung, doo, woos een ömmer n störrgste durchschüddeld hodd, aufgegroowe hömm, iss mirsch vuurkomme, wie wenn a alt‘s Pharaonen-Groob in Ägypten geöffnet würrd.

Ich wollt‘ doo live dabei sei, unn hobb ernsthoffd gedocht, däss doo irchend a unterirdischer Geist, Gott odder halt a mystisches Wesen dinn licht, der/des die Autofohrer ömmer vo onnde gepackt unn durchgschüttelt hodd, unn den merr jetzt unsanft weggt unn in sei Ruh stört. Ob’s soo woor unn ob sich doss rächt? Nur der Baggerfohrer wääs doss unn würrds merke.

Interessant, wie Namen sich einprägen

Intressant aa, wie sich Noome vo Kreuzunge, die nooch berühmte Bauwerke odder Firmen benannt werrn, eiprääge. A jeder redd nur vo die „BayWa“-Kreuzung unn jeder wääs, woss gemeent iss. Unn stellt euch vüür, die Beate Uhse odder der Erotik-Versandhändler Orion hädd oo derre Stell a gröss Gschäft: ob mer doo im katholische Neuscht von die „Beate-Uhse“ odder die „Orion“-Kreuzung red dääd?

Ich glebbs nedd. Doo scho ehrer „JYSK“- odder „JOPP“-Kreuzung, weil’s halt doch a weng neutraler iss unn leichter über die Zunge gädd wie „Dänisches-Bettenlager-Kreuzung“ …

Servus, der Eustach.