Neulich hadd ich mittn Gotthold die Idee, unner zwee alte Fohrräder zu bagge, mittn Zuuch vo die Neuscht off Schweifert zu fohrrn, ömm dann – ganz ohne Rhöner Hüggel – a boor Kilometer gemütlich oon Main entlang zu fohrrn. Vuur unner Abfahrt hobb ich nedd guut gschloffe, weils mir vuur die Fohrkorrdekäfferei gegraust hodd. Zwee ältere Männer mit zwee noch ältere Fohrräder vo Neuscht off Schweifert, doss muss jo kompliziert sei, docht ich. In Neuscht bin ich ganz vursichtig unn mehr neugierhallwer amoll nei s altehrwürdig Boohofsgebäude und hobb ghofft, däss vielleicht doch noch so a guter Geist dinn setzt, der höllft.
Owwer Pfeuffedeggl. Alles sauber unn modern eigericht und links in die Eck a ganz neuer Automat mit die Aufschrift „Video-Reisezentrum“. Mehr gelangweilt hobb ich offn grösse grüne Knoopf gedröggt, do hodd sich prompt a Moo offn Monitor gemeldt und gfräächt, ob er mir ghölf konn. „Ja wenn doss gädd, gloor!!!“ hobb ich gsocht. „Zweemol Schweifert mit Fohrrood, alles hie und zurück.“ Ruckzuck hat der Moo doss alles ausgekaspert, der Automat hodd die Rechnung gezeigt, ich bezohlt und fertig woor die Sach!
Hervorragend! Do muss merr die Boh fei wallich aach amoll lob! Und a Idee iss merr komme. Worömm nedd noch dem Vorbild Online-Wirdschoffde eiricht?! Vill Durfwirdschoffde senn leer, weil kee Wirt merr droff iss, owwer noch gut beiananner. Und die Kundschoffd iss aa noch doo! Der Wirt setzt zentral in Schweiferrd odder Würzburch und wüürd online in die verschiedene Wirdschoffde g?schalt. Die Gäst bestelle a Bier, a Schurrle odder n Schoppe. Kassiert würrd üüwern Automat und der Wirt gidd anschließend per Knopfdruck n Ausschank frei. Belegte Brödlich lieche in glenne, gekühlte Föchlich, merr bestellt, bezohlt, der Wirt gidds Foch frei und merr nimmt sei Krakauer-Bröödle raus und esst!
Herrlich! Wenn a Schoofkopfrunde zommsetzt und a Bruns-Korrder gebraucht würrd, konn merr sich doss per Video-Wirtschoffdszentrum aach noch vuurgstell. Würrd der Online-Wirt halt zugschalt, sidd sei Korrde und spielt üüwern Bildschirm mit.
Bloß wenn?s dann offs End zugedd, die Gäst in die Wirrdschoffd scho schwer beloode senn, der letzt Gast vonn Stuhl roo fälld und der Wirt dringend zum Aufheewe gebraucht wääred – do konn no selbst der best Online-Wirt aach nix merr ghölf! Servus, der Eustach.
