So, Pfingste aach widder gschafft. Und tausende moll iss gestern Nochmiddoch nooch n Kaffee widder der berühmt Satz gfalle: „Sissde Fraa, senn die Feierdääch aach scho widder ball römm!“ Ja, ja. Schöö, däss zwee Dooch amoll kee Zeitung geewe hodd. Worömm? Weils jo fast nix merr auszuhalte iss, woss merr alles laas muss!

Nur amoll a glenne Auswahl vo

die vergange Woche: „Nürnberger Stadtwerkechef verdient fast 500 000 Euro im Jahr“, „13 Wochen Lieferzeit für einen Kochtopf“, „Wirtschaftweiser Bofinger: Bargeld abschaffen“, „Neue Kita-Streiks“, „Wieder Bahn-Streik“, „Bahn-Streik beendet“.

Der Reih nooch: Mit 400 000 bis 500 000 Euro pro Johr verdiene die Stadtwerke-Bosse vo bayerische Großstädt ungefähr dreimoll so vill wie ihr Chefs, die Oberbürchermässder! In drei Johr iss doss so vill Geld wie a Erzieherin in a Kita in ihr ganz Erwerbsleben gricht!

Weiter: Der ehrenwert Wirtschaftweise Bofinger vo Würzburg fordert, s Bargeld obzuschaffe. Hodd der n Gnall? Wie sölle merr denn nocherd beis Schoofkopfkorrde bezohl? Mit Kieselsteelich, Murmel, Kreditkorrde odder Naturalien vielleicht?! Konn ich mir so vuurgstell, wie mei Gotthold nooch a zünftiche, schorrfe Korrdbordie jommert: „Deifel, noch amool, ich hobb nachte beis Korrde drei Ster Holz verlurrn!“

Aach verröggt: 13 Woche Lieferzeit hodd derzeit a ganz bestimmter Kochdoopf. Thermomix nennt sich doss Gerät und iss so a Oord Mischmaschine odder Hilti für Hausfraun. Üüwer 1000 Euro kossd doss Ding und wüürd gekäffd wie blöd.

Die Krönung: Die Kitas streike und natürlich aa widder die Lokführer. Hömm dann owwer aufghört. Üüwer 20 Streikdooch senn bei die Booh seit September 2014 jetzt scho zomm komme!

Direkt putzig degeeche die Würzburger Philharmoniker, die jetzt aach nooch n neu ausghannelde Tarifverdrooch bezohlt wär welle. Hömm desswaache n Warnstreik gemocht und a Orchesterprob ömm satte 20 Minudde obgekürzt. Die werrn beis nächst Konzert a schöö Zeuch zomm spiele! Noch amoll zurügg zunn Bahnstreik. Es gidd aach Leut, die doo broffidirrn. Fräächt a verzweifelte Mudder a annere: „Bei uns iss scho widder Kita-Streik. Ich wääs nedd, wo ich mit mei zwee Glenne hie söll. Wie macht denn ihr doss?“ Seecht die anner Mudder logger-floggich: „Kee Problem für uns, mei Moo iss Lokführer!“

Servus, der Eustach.