Sgidd jo bekanntlich Gschäffde, bei denne merr, wenn merr eikäfft, am End woss gschenkt gricht. Jeder well schließlich sei Kundschoffd halt und revanchiert sich fürrn Einkauf und die Treue. 'N Michl Müller sei Gelbwurschtsong iss scho legendär und beschreibt, wie?s bein Metzger für die Kinner ömmer a Scheible Wurscht gidd. Die Kaffeebohne und 's Gloos Wasser in a Café senn fast scho selbstverständlich und der Glückskeks bein Chinees odder Mongole ghört aach irchendwie dazu. Vonn Ouzo bein Grieche ganz zu schweiche. Alles, woss ich bis jetzt oogführt hobb, iss kee Problem. Merr grichts hiegstellt odder nimmts midd und fönnef Minudde später isses gesse odder getrunke.
Ganz annersch verhält sichs mit die berühmte Tempo-Taschentücher (fränkisch: Dembo-Daschendücher) in mei Abbodeeg. Mecht zurzeit weeche die Grippewelle Riesengschäfte und haut die Daschendücher naus, däss nixmerr feierlich iss. Wenn merr wie ich a boor Johr lang nixmer in a Abbodeeg woor, fräät merr sich jo noch üüwer s erscht Beggla. Konn merr schließlich gut gebrauch. Beis zwett, drett und viertmoll innerhalb kurzer Zeit, isses aach noch kee richtigs Problem, weil merr die Begglich Nummer zwee, drei und vier jo gut verdääl konn. Eeens neis Auto, eens offs Nochtkästle, eens nei die Jaggedösche zum Beispiel.
Wenn du dann owwer zuss föfftmoll hie künnst, widder s berühmt Beggla Daschendücher neis Döschle gschdeggd grichsd, fängts oo. Wagg schmeiß well mersch nedd, so iss merr nedd erzooche. Verschenk gädd aa nedd, weil jo jeder s gleich Brobleem hodd und sellwer nedd wääs, wo hie mit die flauschig-wäche Dinger.
Als Routinier fängt merr dann s Taktiern oo. Merr hodd rausgricht, däss es, wenn die Arznei nei a Plastikdüddle künnt, nie ohne s berühmt Beggla Dembo-Daschendücher gedd. Also seecht merr scho gleich ungfräächt, däss merr kee Düddle braucht. Merr bezohlt, bedankt sich, dräht sich römm und denkt: „Jou!!! Kee Daschendücher!“ Ungfähr off hallwer Stregg zwösche Theke unn Loodetür dann der Ruf, wie ein Stich neis Herz: „Moment! A boor Daschendücher???“ Merr bleid wie vonn Blitz getroffe stänn, setzt a süss-sauersch Lächeln auf, drääd sich römm und seecht freundlich: „Ja, gern!“ Und üüwerleecht im sellwe Aachebligg krampfhaft: Wo denn dehemm hie mit Beggle Nr. 23? Servus, der Eustach!
