Halt Halt!! Warft mer net euer Chrisbaame wag! Verbrönnt se net, hackt se net zomm -die Frau Grasemann hot mir nämlich die Aache geöffnet. (Dos is die, die wu mir als Schoof en Summer mei Fudder und Blumme waggfresse hot). Wie gsocht, selwich Fraa is widder emol ins Fernsehn mit ihrn groeße Korb durch en Waald gewallt, hot mit die Schäär Kieferschpetze ro gschniede und nooch Duglasien gsücht, wu se aach gsäwel konn. Sie hot ganz verglärt die Aache zugedröckt wie se dro geroche hot, weche darre edäärische Öle und gsocht, däss halt die Duglasien dünn gsäät wärn bei uns. (Hot die eine Ahnung wies bei uns die Weihnochte vo darre nerre so wimmelt). Und sie möcht vo darre Schbetze einen wunderbore Badezusatz.

Jetz kümmts: Sie murkst nu alles kurz und klää, vermöscht dos alles mit viel Saalz und alles söll durichzieh und tröckel. Und däss die Boodwann net verschtopft, haut se alles nein Mixer mitsamts es Saalz. Drei Esslöffel vo dann Mansch tüt se na nei klänne Mullsecklich, die se aus Mullbinde zommgeradelt hot. Nu warn se mit Schläfflich zommgebunde und beis Boode nei die Boodwann läss heng.

Ja - hollafuchs - hob ich gedocht. Is dos net e wunderbore Sach! Mir brauche net nein Waald, mir namme unner teure Chrisbaame, wu mer lang genung ookhimmelt hömm, schüe obgedröckelt senn se aach, säweln se zomm, jooche se liebevoll durch en Mixer, fölle se nei Secklich, mit die goldeniche Schläfflich zommgebunde, nei die Boodwann neis Boodwasser khengt, leche uns nei die Boodwann, dröcke aach verglärt die Aache zu und singe es ganz Johr: „Oh Tannenbaum oh Tannenbaum, wie grün machst du den Badeschaum. Du grünst nicht nur zur Weihnachtszeit du bist ganzjährlich griffbereit. Oh Tannenbaum, oh Tannenbaum, schüe zommgemixt ein Badetraum!

Do hömmersch

Für en Merker:

Ich wünsch euch alle mit odder ohne Boodwann noch e glückselichs Neus Johar Cipi