Mir genn in dem Sommer interessante Zeite entgeche. Bloes noch vier Monat sinds bis zur Wohl im September. E Zukunft ohne Mutti Änschie? Fast ned auszudenke. Trotzdem mösse mer ons drauf eistell, dass die personifizierte Raute vo Berlin ball ühr Rente gricht. Wos bleit ons also übrich, die Stern am Himmel mösse drü entscheid, wer ons demnächst rechiert. Do drauf hömm sich scho die alte Grieche on die Ägypter on wer weiß noch alles für e poor Tausend Johr verlässe.
Enns is scho jetzt klor. Der „Stern des Südens“, odr sölled mer gleich sooch „Kreuz des Südens“, leücht nix mer so strahlend, här blinzelt halt grod noch so e weng für sich hie. Desselbe konn mer ower aach vo dem „Nordlicht“ behaupt, des hat bis jetzt noch gor net zu leüchte ogfange. Is aach kee Wonner, Polarlichter mache im Sommer aach üwerhaupt kenn Sinn. On wos machd der westliche Himmel? Ned mehr wie e lausich Sternschnuppe gidds do zu senn, die aach zu allem Üwerfluss noch racht Lasch-et dohär köömt on in unglücklicher Weis vo schwarze Wolke verdeckt werd.
Bärbock, das neue Sternbild
Üwer allem ower strahlt des Bild vom „Großen“ und vom „Kleinen Bär“, do dezu der „Steinbock , där nooch Auskunft vo onnere astrologische Wohlforscher, Schmarrn Sterndeüter, zum Herwest hie zu em ganz neüe Sternbild, dem „Bärbock“ zommgefasst wär soll. Sie vereiniche sich schließlich dann zur „Jungfrau“, wos widder zur Folche hat, dass sich des möchlicherweis zegor zum „Drachen“ hie entwickel konn.
Die neü Bundeskanzlerin konn dann also ganz entspannt ühr eichene Hymne seng:
Oh ihr Sterne, lasst mich nicht allein,
Oh ihr Sterne, kann denn Regieren Sünde sein.
Ich seh den Sternenhimmel, Sternenhimmel oh oh.
Mit dir in der Regierung stehn, oh Armin, das wär wunderschön,
du Sternschnuppe am Firmament, ich spür, wie schon bei dir die Sehnsucht brennt.
Auch ich fühl schon die ersten Triebe,
weil ich das Regieren liebe,
und mit meinem großen Herz ertrage ich sogar den Merz.
Lieber Armin lass mich nicht allein,
mit dir regieren kann doch keine Sünde sein.
Wir sehn den Sternenhimmel……..
Ned auszudenke
