Also doch: die Kreisklinik iss …….. nee, Schmarrn, iss doch scho widder Schnää vo nachte. Ich meen woss ganz annersch. Jetzt hömm die Bayern unnern blond gelockte, kombledd undäddowierte, Ur-Bayern Bastian Schweinsteiger off England verkäfft und defür also doch den schwoorz gebläddelte, kombledd däddowierte, Un-Bayern Arturo Vidal gholt. So monches sündhaft teuer Edel-Bad iss schlechter gefliest wie denn sei Koopf frisiert iss! No ja, wenn merr 10 Millione odder mehr im Johr verdient, konn merr scho amoll 80 Euro bein Friseur geläss! Owwer woss reech ich mich auf. Mir hömm jetzt eh n Mooned 08/15 unn do iss mir doss wurscht-egal, woss die Bayern mache! Owwer n Arturo sei Däddowierunge, he? Spiderman, n Rosekranz, n Gaul mit Reiter, n Nome vo sein Buuwe unn vo sein Neffe und s Gsicht vo sei Mutter. Do werrn die annere Bayern-Spieler beis Dusche erscht amoll a boor Dooch zu gugge hömm, bis sie alles gsenn hömm. Annerseits: Däddowierunge gidds scho seit Tausende vo Johrrn! Der Arturo Vidal künnt vo Chile und woss sooch ich euch? In Chile hodd merr 7000 Johr alte Mumien gfonne, die Däddowierunge oo Händ unn Füß hatte.
Und der Ötzi, die alt Gletscher-Mumie, 5000 Johr alt (die erscht Frooch vo ihm, wie senn domols gfonne hömm: „Labbdn der Johannes Heesters noch?“) hadd mehrere Zäche, die mit Noodel unn glenne Einschnitt unter sei Haut gebrochd wurrn senn. Und mir vuur 30-40 Johr? „Dubble Bubble“! Kennt ihrn noch? Doss woor a Kaugummi, eckig unn kantig wie a glee Stöggle Säffe, in den Abziehbildlich dinn woorn. Abziehbildlich - die Dadduus unserer Jugend! Spätze offn Orm gemocht, n Dubble Bubble ausgebaggd, s Abziehbildle raus und offn nosse Orm geklatscht. A Viertelstonn später worsch widder furrt, weil mir bein Fußball bei 30 Grad gschwitzt hömm wie a Sau. Erscht deutlich später hömmer üwrigens gelernt, däss merr „Dubble Bubble“ ächentlich „Dabbl Babbl“ ausspricht. Es sei uns verziehe! Owwer gut. Heut gidds jo fast keen merr, der nedd däddowiert iss.
Früher hodd merr im Radio, wie merr nooch n Gauner gsücht hodd, ömmer ghört: „Achtung! Der Gesuchte trägt eine Tätowierung!“ Heut müsst merr besser sooch: „Achtung! Der Gesuchte ist nicht tätowiert!“ Den hätt merr wohrscheinlich gleich! Ich wünsch n Arturo Vidal bei Bayern München jedenfalls viel Erfolg. Gut nackert, schlofft hemmert!
Servus, der Eustach
