Die Meldung hodd mich vuur knapp zwee Woche wie der Schlooch getroffe: „Das Bistum Würzburg hat einen neuen Bischof!“ Nedd, däss ich mich dodrüü nedd frää dääd! Ganz im Geechedääl. Nur: der neu Bischof hässd nedd bloß Jung, er isses aach noch! 51! Unn mei Brobleem: doss iss der erscht Würzburcher Bischof, der jünger iss wie ich! Ich bin nerr froh, däss merr n Papst Franziskus hömm. Der iss scho 81 und söll vo mir aus noch a langs Laawe hoo!
Ja, merr würd halt nedd jünger. Doss muss irchendwenn amol jeder Mensch eiseh. Mache owwer nedd alle. Gugg nerr bloß amoll off die Olymbische Winterspiele, die merr jetzt in Südkorea hadde. Der japanisch Skispringer Noriaki Kasai iss 45 unn springt bei die junge Flöhhobbser noch mit. Und den nowegische Biathleten Ole-Einar Björndalen musste se dehemm fast oobind, däss er nedd mit off Pyeongchang unn mitgerennd iss.
Oder die Claudia Pechstein! Iss n vergangene Durschdich 46 Johr alt wurrn unn bein Eisschnellauf bei Olymbia noch mitgelaffe. 5000 Meter! Siebe Runde lang hodd se losgeleecht wie die Feuerwehr, no woor der Oofe aus. Und sie nochher: „Die ersten Runden konnte ich noch gut mithalten, dann ging es einfach nicht mehr. Ich weiß auch nicht, an was es lag.“ Ich well der gut Frau Pechstein jo nedd zu noh tret, owwer ich hobb do so en leise Verdacht: könnt?s vielleicht gsei, däss die gut Fraa für so a Sportart nu doch langsam zu alt iss?
Einsehen? Pfeuffedeggel! „Gut, dann muss ich bis zur Goldmedaille eben noch vier Jahre lang warten!“ Peking 2022. Do iss die Frau Pechstein no knapp 50 unn well trotzdem noch amoll oogreuf. Mein Segen hoddse! Muss halt see, die guud Fraa, wie se ihr Schlittschuh mits Gehweechele oo die Eislaufboh hie brengt.
S nützt alles nix, mir werrn alle älter, doss lässt sich nedd aufhalt. Irchendwenn müsse merr dann wohl odder übel aach erdrooch, däss Witz über uns unn unner Alter gemocht werrn. Beispiel: in die Schul hömm sich die Kinner üüwer Omma unn Obba unterhallde und düchdich Sprüch gemocht: „Mei Obba iss scho 80 Johr alt, kümmert sich sellwer ömm sein Gorrde und mecht noch alle Einkäuf allee!“ „Doss iss jo gor nix!“ hodd a annerer gsocht. „Unner Omma is 85 unn hodd n vergangene Sommer s Sportabzeichen gemocht!“ „Phh!“, seechd a Meedle abfällig. „Mei Obba is jetzt 92, leffd noch jeder Fraa hinnerher, er wääs bloß nix merr, worömm!!!“
Servus, der Eustach.
